Ulet niveli i ndotjes së ajrit në Shkup
10.01.2025 15:38
Shkupi, pas disa ditësh të kaluar midis 10 qyteteve më të ndotura në botë...
Shkupi, pas disa ditësh të kaluar midis 10 qyteteve më të ndotura në botë, këtë mëngjes shënon një rënie në renditje. Sipas tabelës së platformës për matjen e ndotjes së ajrit “IQAir”, në orën 09:15 kryeqyteti gjendet në vendin e 57-të në botë.
Vlera e nivelit të grimcave të dëmshme PM është 63 njësi në Shkup dhe bën pjesë në kategorinë e shënuar me fushë të verdhë si nivel i moderuar i ndotjes. Ministria e Mjedisit Jetësor dhe Planifikimit Hapësinor këto ditë ka bërë thirrje për të gjitha institucionet përgjegjëse, komunat dhe Qytetin e Shkupit, që të kryejnë më intensivisht detyrimet e tyre në përputhje me "Planin e Veprimit për sezonin e ngrohjes 2024-2025".
“Ndërmarrjet publike për higjienën komunale të komunave dhe Qytetit të Shkupit duhet të kryejnë rregullisht pastrimin atmosferik dhe larjen e rrugëve e trotuareve. Inspektorati Shtetëror për Ndërtimtari dhe Urbanizëm, si dhe inspektorët komunalë për urbanizëm dhe ndërtimtari, duhet të kryejnë kontrolle emergjente të përforcuara në kantieret e ndërtimit.”, thuhet në njoftimin e Ministrisë së Mjedisit dhe Planifikimit Hapësinor.
Nga LSDM-ja kërkojnë që Qeveria të mos injorojë gjendjen me ndotjen e ajrit. Socialdemokratët kërkojnë që Qeveria t’i pranojë masat që i ka ofruar LSDM-ja.
“Kontrollet mbi industrinë duhet të intensifikohen. Duhet të kryhen kontrollime në kantieret e ndërtimit dhe të ndalohen punimet ndërtimore në qytetet me ndotje të shtuar. Aktivitetet intensive për pastrimin publik: larja e rrugëve, pastrimi i deponive ilegale dhe mbledhja e mbeturinave. Kontroll më i fortë mbi gjendjen teknike të automjeteve. Duhet të bëhet një riorganizim i orarit të punës për punëtorët në natyrë, me orar të shkurtuar nga ora 11:00 deri në 17:00.”, - theksoi Bogdanka Kuzeska nga LSDM.
Reagojnë nga VMRO-DPMNE-ja. LSDM-ja, sipas VMRO-së gjatë shtatë viteve të saj në pushtet nuk bëri asgjë dhe nuk mori asnjë masë për të reduktuar ndotjen e ajrit.
“Kur LSDM-ja propozon disa masa është mirë që të informohen ose të paktën të bëjnë një kërkim në Google dhe do të shohin se ato masa që i propozojnë si urgjente, tashmë janë miratuar dhe po implementohen. Qeveria ka miratuar tashmë një plan veprimi për ajër të pastër për periudhën 2024-2025, i cili përfshin zbatimin e masave afatshkurtra në nivel kombëtar për uljen e emetimeve të grimcave të ngurta dhe të dëmshme.”, thuhet në reagimin e VMRO-DPMNE-së.
Përndryshe, që nga fillimi i vitit, Shkupi është ndër qytetet më të ndotura në botë, madje një ditë u rendit në vendin e parë sipas ndotjes së ajrit.
BELINDA KOKA ADEMI