FB publikon raportin e transparencës: Maqedonia me 49 kërkesa për 40 llogari

Raporti i fundit i transparencës, i realizuar nga Facebook, tregon se kërkesat e qeverive janë rritur me 13% në gjysmën e dytë të vitit 2015.

 

Kompania ka marrë mbi 46 mijë kërkesa për të dhënat e përdoruesve gjatë gjashtë muajve të dytë të vitit 2015, krahasuar me rreth 41 mijë kërkesa që ka marrë në gjysmën e parë të vitit 2015. Këtu përfshihen mesazhet, adresat IP dhe informacionet rreth llogarisë së përdoruesve.

 

Nga organet në Maqedoni, Facebook ka pranuar  49 kërkesa të cilat lidhen me të dhënat e 40 llogarive në rrjetin social. Në raportin e kaluar kishte pesë kërkesa me të dhënat e tetë llogarive. Sikurse bëjnë me dije zyrtarë të Facebookut këto informacione lidhen kryesisht me hetime për raste kriminale.

 

“Si pjesë e hetimeve zyrtare apo kërkesave të qeverive rreth  personave që përdorin Facebookun dhe shërbime të tjera si Messenger apo Whats up, rezulton se pjesa më e madhe e kërkesave kanë të bëjnë me dyshime për persona që hetohen për çështje kriminale, ndër të cilat pengmarrje apo vjedhje. Në shumë raste qeveritë kërkojnë të dhëna personale të personave në fjalë dhe shërbimeve që ai përdor. Në raste të caktuara kërkesat lidhen dhe me vendndodhjen e tyre, ose përmbajtjen e komunikimeve në këto rrjete.”- thuhet në raport.

 

Rrjeti social Facebook bashkëpunon me të gjitha shtetet që kërkojnë informacione zyrtare, duke u mundësuar atyre të dhëna për persona ose organizata që shkelin ligjet lokale.