Skulpturat shqiptare humbën në sirtarët e komunave

 

 

“Kjo nuk është nën kompetencat tona dhe me Trupin Koordinues të kryetarëve nuk e kemi diskutuar këtë çështje”- theksoi kryetari i qytetit të Shkupit, Koce Trajanovski.

 

Edhe komuna Qendër nuk e ka të qartë se ku ka mbetur procedura për vendosjen e përmendoreve shqiptare. Para një muaji, nga kjo komunë deklaruan për TVM-2 se faturat për punimin e përmendoreve nuk janë paguar fare. 

 

“Që të vendosen përmendoret e tre veprimtarëve shqiptar, të cilat e dimë që janë pjesë e projektit “Shkupi 2014”, duhet të paguhen faturat për punimin e tyre. Kompetentët në komunën Qendër ende nuk mund t’i gjejnë dhe i kërkojnë faturat. Opinioni e di se çfarë ndodhi mes rretheve zgjedhore në zgjedhjet e fundit lokale dhe se shumë nga dokumentacioni humbi”- deklaroi zëdhënësja e Komunës Qendër, Katerina Canevska.

 

Jozyrtarisht mësojmë se është zhvilluar një takim mes kreut të komunës Qendër, Andrej Zhernovski dhe një delegacioni të Bashkimit Demokratik për Integrim, për të parë se ku ka ngecur çështja e përmendoreve shqiptare.

 

Vendosja e përmendoreve të Nexhat Agollit, Pjetër Bogdanit dhe Josif Bagerit në Shkup, duhej të ndryshonte karakterin monoetnik të  projektit  “Shkupi 2014 “ dhe të ulte pakënaqësinë e shqiptarëve.