Kodi Zgjedhor, Rokas pret konsensus nga partitë politike, ndasitë politike mbajnë partitë larg dakordimit

 

“Ne me të vërtetë shpresojmë se me ditën e sotme dhe një ditë tjetër shtesë do të mund të arrihet konsensus. E kuptoj se koordinatorët partiakë po takohen në baza ditore dhe shpresoj se ky hap do të përmbushet. Siç e dini, bëhet fjalë për 4.2 milionë euro, të cilat janë parashikuar për të mirën e qytetarëve në Maqedoninë e Veriut, andaj shpresoj se ky konsensus do të mund të arrihet deri në fund të ditës së nesërme.”, - deklaroi euroambasadori, Mihalis Rokas.

 

VMRO – DPMNE konsideron se opozita po bën teatër dhe nuk kanë për qëllim të dakordohen për Kodin e ri Zgjedhor.

 

“Njëra palë, gjoja, i bëri thirrje opozitës të ulej dhe të bisedonte, ndërsa pala tjetër gjoja e hodhi poshtë ofertën. Kjo është thjesht një lojë sipërfaqësore e opozitës, me qëllimin e vetëm të mos lehtësojë votimin e diasporës dhe të mos sjellë Kodin e ri Zgjedhor. LSD-ja, E Majta dhe BDI-ja nuk duan një Kod të ri Zgjedhor, sepse po e përgatisin këtë çështje si alibi përpara ciklit të ardhshëm zgjedhor.”, - theksoi Valentin Manasievski nga VMRO-DPMNE.

 

LSDM-ja nuk heq dorë nga kundërshtimi që diaspora të votojë në formë elektronike, pasi hapet rruga për keqpërdorime. Kryesocialdemokrati Filipçe druan në synimet e Lëvizjes E Majta.

 

“E pamë edhe njëherë se E Majta është opozitë e kontrolluar nga ana e Mickoskit dhe VMRO-DPMNE-së. Ata propozojnë bashkim të qëndrimeve të opozitës rreth Kodit Zgjedhor. Kush janë ata që të iniciojnë diçka me urdhër të Mickoskit.”, - u shpreh kryetari i LSDM-së, Venko Filipçe. 

 

E Majta kërkon financim transparent gjatë fushatës, përkrah votimin e diasporës nëse modeli zgjedhor transformohet në një njësi zgjedhore. Partitë opozitare shqiptare janë për votimin e diasporës në formë elektronike. Por, Lidhja Shqiptare e Zijadin Selës kërkon që diaspora të përfshihet edhe në parlamentare dhe lokale. BDI është  për një njësi zgjedhore, me lista të hapura dhe prag zgjedhor prej 5%.