Saraj, filloi rregullimi i shtratit të Lumit të Thatë

 

“Sot po hedhim themelet e një investimi më historik që ka pasur Komuna e Sarajit, rregullimin e plotë të shtratit të Lumit të Thatë. Për vite me radhë banorët e fshatrave përgjatë këtij shtrati kanë jetuar nën kërcënimin e vazhdueshëm të përmbytjeve, kanë pasur tokat e tyre bujqësore të dëmtuara, shtëpitë nën rrezik dhe sigurinë e familjeve të tyre të vënë në pikëpyetje në çdo sezon të reshurave. Sot ky kapitull shqetësimi po mbyllet. Projekti parasheh rregullimin e shtratit të lumit me gjatësi prej 12 kilometrave nga fshati Bojanë deri në vendbanimin Gllumovë, ku Lumi i Thatë derdhet në lumin Treska.”, - deklaroi kryetari i Komunës së Sarajit, Muhamed Elmazi.

 

Për këtë investim, Ministria e Mjedisit Jetësor dhe Planifikimit Hapësinor ka siguruar 6 milionë euro. Ministri i Ekologjisë, Muhamet Hoxha, tha se ky është një investim që po bëhet realitet.

 

“Me rregullimin e këtyre 12 kilometrave të rrugës nga fshati Bojanë deri në Glumovë, ne mbrojmë drejtpërdrejt shtëpitë, pronat dhe tokën bujqësore të mijëra qytetarëve të kësaj ane. Ajo që është më e rëndësishme është se po i japim fund ndotjes dhe po i eliminojmë rreziqet për shëndetin e njerëzve gjatë periudhës së verës. Qytetarët e Sarajit meritojnë një mjedis jetësor të pastër dhe një jetë më të sigurt.”, - theksoi ministri i Mjedisit Jetësor, Muhamet Hoxha.

 

Kryeministri Hristijan Mickoski tha se Qeveria vazhdon të mbështesë projektet infrastrukturore komunale, përmes të cilave do të përmirësohet jeta e përditshme e banorëve.

 

“Ky është një projekt kapital me rëndësi jetike, që ka për qëllim të përmirësojë cilësinë e jetës së banorëve, të cilët praktikisht të ardhmen e tyre e ndërtojnë pikërisht këtu, pranë këtij projekti. Njëkohësisht, për këtë projekt dua ta falënderoj edhe kryetarin e Komunës së Çairit dhe bashkëkryetarin e VLEN-it, i cili kur ishte ministër i Mjedisit Jetësor e nisi këtë projekt që sot po bëhet realitet.”, - u shpreh kryeministri, Hristijan Mickoski.

 

Punimet ndërtimore për rregullimin e shtratit të Lumit të Thatë zyrtarisht kanë filluar më 7 korrik dhe priten të përfundojnë deri në vitin 2029.