Stuhia në Shkup – 15 persona përfunduan në spital, numri i urgjencës regjistron 12 mijë thirrje

 

Nëntë pacientë u trajtuan në Klinikën Universitare për TOARILUC. Drejtori i klinikës, prof. Dr. Igor Merdzhanovski, informoi se dy persona pësuan lëndime serioze. Një pacient me lëndim në kokë u transferua në Klinikën e Neurokirurgjisë, ndërsa një tjetër ka një krah të thyer. Të lënduarit e mbetur kanë lëndime të lehta dhe janë nën mbikëqyrje mjekësore. 

 

Edhe pse asnjë pacient i lënduar nga stuhia nuk u pranua në Spitalin e Përgjithshëm të Qytetit "8 Shtatori", spitali pësoi dëme të konsiderueshme materiale. Sipas drejtorit, Dr. Sinisa Stojanoski, dëmet më të mëdha janë në çati dhe strukturën e çatisë, dhe vlerësimi i saktë do të bëhet pas inspektimit. 

 

Qendra e Menaxhimit të Krizave informon se në periudhën nga ora 17:00 deri në 21:00, në numrin 112 janë pranuar më shumë se 8,300 thirrje. Për shkak të numrit të madh të raportimeve, në orën e parë janë aktivizuar ndërrime shtesë të operatorëve. 

 

Pas stuhisë së fuqishme që goditi sot Shkupin dhe rajonin, kryetari i Komunës së Çairit, Izet Mexhiti, njoftoi se është mbajtur mbledhja e Shtabit të Emergjencës për të vlerësuar situatën dhe për të koordinuar veprimet e institucioneve komunale. Mexhiti bëri të ditur se ekipet e komunës kanë qenë të angazhuara në terren gjatë gjithë kohës dhe vazhdojnë të jenë në gatishmëri të plotë për t’iu përgjigjur çdo nevoje të qytetarëve. Kryetari i Çairit theksoi se edhe personalisht ka dalë në terren së bashku me ekipet kompetente për të parë nga afër gjendjen dhe për të koordinuar ndërhyrjet në zonat ku ka nevojë.