Shtohen rastet me ethet e Nilit, shtatë pacientë të shtruar në Klinikën Infektive

 

“Rastet e regjistruara përfaqësojnë të ashtuquajturën majë të dukshme të Ajsbergut Epidemiologjik; nën sipërfaqe, mbetet një numër i panjohur infeksionesh asimptomatike dhe të lehta që nuk diagnostikohen ose regjistrohen kurrë. Shumica e rasteve janë autoktone, duke konfirmuar se virusi qarkullon në ciklin natyror midis zogjve dhe mushkonjave këtë verë dhe se ka transmetim lokal. Kjo është një arsye për mbikëqyrje epidemiologjike dhe entomologjike për kontrollin e mushkonjave. Nuk ka arsye për panik, por ka arsye për kujdes dhe informacion të duhur.”, - deklaroi epidemiologu, Dragan Danillovski.

 

Ministri i Shëndetësisë thekson se janë në koordinim të vazhdueshëm me Agjencinë e Ushqimit dhe Veterinarisë, me qëllim përcjelljen e gjendjes me mushkonjat në vendin tonë.

 

“Dje janë vërtetuar 3 raste, që më herët nuk kanë qenë në Klinikën Infektive. Përveç rasteve të lidhura me Greqinë, ka raste që definitivisht nuk kanë udhëtuar  jashtë vendit dhe vendbanimi i të cilëve është në zonën fushore të Shkupit. Tashmë janë marrë masa standard nga  Instituti i Shëndetit Publik, Komisioni për Sëmundje Infektive dhe do të merren masa shtesë.”, - theksoi ministri i Shëndetësisë, Sasho Klekovski.

 

Autoritete shëndetësore theksojnë se simptomat e pacientëve të infektuar  janë me  temperaturë e lartë, dhimbje e fortë koke, çorientim dhe çrregullim i vetëdijes. Personat e hospitalizuar janë infektuar nga pickimi i mushkonjave të infektuara. Periudha e inkubacionit zakonisht zgjat nga 3 deri në 14 ditë pas pickimit, ndërsa shumica e personave e kalojnë infeksionin pa e kuptuar se kanë qenë të infektuar me virusin.