Tiranë: Valon Bela dhe Bekir Halimi shpallen “non grata”

 

Nga Ministria e Brendshme thuhet se Halimi e Bela dyshohet se zhvilluan veprimtari që cenojnë sigurinë kombëtare dhe rendin kushtetues të Shqipërisë. Propozimi për shpalljen e tyre të padëshiruar u bë fillimisht nga Drejtoria e Antiterrorit në Policinë e Shtetit, e cila grumbulloi informacion të veprimtarisë së tyre. Më pas erdhi firma e ministrit të Brendshëm Besfort Lamallari.

 

Urdhri i tij u është përcjellë për zbatim Policisë së Shtetit dhe strukturave të Policisë Kufitare, të cilat do të garantojnë ndalimin e hyrjes së tyre në Shqipëri.

 

Në një reagim në rrjetet sociale, Bela shkruajti se ky vendim i Ramës u dha në sinkron të plotë me Vuçic.

 

Mbetet e paqartë se për çfarë veprimtarie konkrete dy shqiptarët e Maqedonisë janë shpallur “non grata”.

 

Ky është rasti i dytë brenda pak më shumë se një muaji kur Ministria e Brendshme përdor mekanizmin ligjor të shpalljes "non grata" për arsye të sigurisë kombëtare.

 

Më 25 qershor, e padëshiruar u shpall edhe shqiptarja e Kosovës, Ikballe Huduti, së cilës iu ndalua hyrja në Shqipëri për 15 vjet, si e lidhur me regjimin iranian.