Ethet e Nilit Perëndimor, regjistrohet viktima e gjashtë në vend

 

“Bëhet fjalë për një pacient 72-vjeçar, i cili u shtrua 15 ditë më parë në klinikë në një gjendje të përgjithshme jashtëzakonisht të rëndë, me një pamje klinike të rëndë. Pavarësisht të gjitha masave intensive të marra në repartin e kujdesit intensiv, dje pasdite ai ndërroi jetë.”, - deklaroi drejtori i Klinikës për Sëmundje Infektive, Fadil Cana.

 

Aktualisht, në Klinikën për Sëmundje Infektive po trajtohen 18 pacientë. Më i riu prej tyre është një 26-vjeçar, fatmirësisht në gjendje të mirë shëndetësore. Gjendja më e rënduar paraqitet te pesë pacientë, të gjithë të moshës së shtyrë.

 

“Aktualisht në klinikë janë të shtruar 18 pacientë, 15 prej tyre me infeksion të konfirmuar me virusin e Nilit Perëndimor dhe tre të dyshuar. Pacienti më i ri është 26 vjeç dhe në gjendje të mirë shëndetësore. Pesë pacientë, të gjithë në moshë të shtyrë, janë në kujdes intensiv me gjendje të rëndë klinike.”, - theksoi drejtori i Klinikës për Sëmundje Infektive, Fadil Cana. 

 

Deri tani janë 53 persona të prekur ose të dyshuar si të infektuar me ethet e Nilit Perëndimor. Te 50 prej tyre virusi është i  konfirmuar, ndërsa për tre të tjerët priten rezultatet e testeve shtesë. Brenda një jave janë regjistruar më shumë se dhjetë raste të reja, madje një ditë më parë u regjistrua edhe rasti i parë në Kumanovë. Prej rasteve të konfirmuara,  27 pacientë janë shëruar dhe janë liruar nga spitali. Ekspertët nuk e dinë nëse ka kaluar piku i virusit për shkak se si gushti, po ashtu edhe shtatori, janë zakonisht muajt me transmetimin më intensiv të virusit të Nilit Perëndimor në Evropë. Kulmi i epidemisë në vend nuk mund të parashikohet saktësisht, por do të identifikohet më qartë kur numri i rasteve të reja  të nisë të bjerë në mënyrë të vazhdueshme.