Zjarret, 4 aktive, 24 janë shuar, ndalimi i lëvizjes në pyje vazhdon deri më 30 shtator

 

“Zjarri i parë është ky pas meje, në territorin mbi fshatin Kopanicë, në zonën e fshatit Saraj. Zjarri po lëviz në drejtim të Tetovës, në malin Zheden. Para disa ditësh arritëm ta shuanim një zjarr në këtë zonë. Ky është një zjarr i ri, që me shumë gjasë është vënë qëllimisht. Ende nuk i dimë motivet, por policia po punon për zbulimin e autorëve. Për shkak të frymës, zjarri po përhapet me shpejtësi drejt kreshtës së malit. Për këtë arsye vendosëm të aktivizojmë avionët “Air Tractor” të Drejtorisë, të cilët tashmë kanë nisur veprimin.”, - deklaroi drejtori i DMSh-së, Stojançe Angellov.

 

Ministria e Bujqësisë informoi se ndalimi i lëvizjes në pyje zgjatet deri më 30 shtator 2026 dhe u bën thirrje qytetarëve për kujdes të veçantë, me qëllim parandalimin e zjarreve në hapësira të hapura. Nga Ministria bëjnë thirrje që të shmanget ndezja e zjarreve gjatë periudhave me erë të fortë ose mot të thatë, si dhe të përdoren metoda më të sigurta për pastrimin e tokës dhe largimin e materialeve të djegshme. Fermerët dhe blegtorët duhet të jenë veçanërisht të kujdesshëm gjatë kryerjes së aktiviteteve të tyre, në mënyrë që të mos shkaktohet djegie e pakontrolluar e tokave bujqësore dhe kullotave, gjë që është rreptësisht e ndaluar me ligj dhe përbën vepër penale, apelojnë nga Ministria.