Shënimi i 23 Tetorit, Ditës së Luftës Revolucionare Maqedonase

 

Dita e Luftës Revolucionare Maqedonase i kushtohet kujtimit të brezave që u angazhuan për lirinë politike dhe vetëvendosjen kombëtare. Idetë dhe veprimtaritë e tyre përbëjnë një pjesë të procesit historik që çoi në krijimin e shtetit bashkëkohor maqedonas. 

 

Në Kuvend është ndarë çmimi shtetëror “23 Tetori”, ndërsa në akademinë solemne, fjalim mbajti kryeministri Hristijan Mickoski.

 

Presidentja Gordana Siljanovska Davkova, me rastin e kësaj dite, deklaroi se respekti ndaj së kaluarës historike duhet të dëshmohet përmes kultivimit të vlerave për të cilat kanë luftuar brezat e mëparshëm. Ajo tha se nderimi i paraardhësve nuk duhet të jetë vetëm shprehje krenarie, por edhe detyrim për ndërtimin e një shoqërie të drejtë dhe solidare, në të cilën do të respektohen dinjiteti njerëzor, e drejta dhe morali. Presidentja theksoi se shteti edhe sot përballet me sfida dhe se detyrimi i brezave të tanishëm është të vazhdojnë aspiratën e paraardhësve për një shtet të begatë dhe të sigurojnë një të ardhme të sigurt për brezat e ardhshëm. Në fund të urimit, ajo ua uroi festën qytetarëve, me mesazhin që 23 Tetori të mbetet simbol i përjetshëm i luftës revolucionare maqedonase.

 

Edhe kryeparlamentari Afrim Gashi me rastin e kësaj dite, përcjell urimet  për të gjithë qytetarët e Republikës së Maqedonisë së Veriut. Ai thotë se shënimi i 23 Tetorit është një mundësi për të kujtuar me respekt të kaluarën, por edhe për të riafirmuar përgjegjësinë tonë të përbashkët për ndërtimin e një shoqërie demokratike, të qëndrueshme dhe të begatë, të mbështetur në respektin e ndërsjellë, unitetin dhe vlerat evropiane.