Britani, arrestohet një ushtarak i lartë amerikan, dyshohet për spiunazh në favor të Rusisë

 

41-vjeçari u arrestua pranë qytetit Gloucester, në jugperëndim të Anglisë, pas një hetimi të përbashkët të policisë britanike kundër terrorizmit, FBI-së dhe autoriteteve ushtarake amerikane.

 

Sipas policisë britanike, i dyshuari është ndaluar për shkelje të Ligjit për Sigurinë Kombëtare të vitit 2023 dhe aktualisht ndodhet në paraburgim në Londër. Ndërkohë, autoritetet po kryejnë kontrolle në dy vendndodhje në qarkun Gloucestershire.

 

Gjeneralbrigade Sean Stinchon, drejtues i Komandës së Kundërzbulimit të Ushtrisë Amerikane, deklaroi se rasti përfshin një ushtarak të lartë, të cilit i ishte besuar informacion i ndjeshëm, duke paralajmëruar për rrezikun e vazhdueshëm të kërcënimeve të brendshme.

 

Drejtori i FBI-së, Kash Patel, e cilësoi arrestimin si një zhvillim të rëndësishëm në një rast të dyshuar spiunazhi, që përbën shqetësim serioz për Shtetet e Bashkuara dhe aleatët e tyre.

 

Autoritetet britanike theksuan se arrestimi është rezultat i bashkëpunimit të ngushtë me institucionet amerikane. Hetimet po drejtohen nga njësia kundër terrorizmit e policisë së Londrës, ndërsa akuzat e dyshuara lidhen me Rusinë.