Nvidia përballet me një tjetër skandal, në pikëpyetje pozicioni i drejtorit ekzekutiv Jensen Huang

 

Sipas gazetës The New York Times, e cila citon pesë persona që kanë punuar në Nvidia, Huang dyshohet se ka pasur një lidhje me Kimberly Powell, zëvendëspresidente e kompanisë për sektorin e shëndetësisë. Dy drejtuesit raportohet se janë filmuar duke shkëmbyer përkëdhelje në një hotel në Kaliforni, gjatë një konference të Nvidia-s në muajin mars.

 

Pretendimet kanë ngritur pikëpyetje për respektimin e kodit të etikës së kompanisë, i cili kërkon shmangien e konflikteve të interesit, përfshirë ato që mund të lindin nga marrëdhëniet personale mes punonjësve.

 

Zhvillimet vijnë pasi Huang pranoi se kishte pasur një marrëdhënie jashtëmartesore me sipërmarrësen kineze Alice Huang, e cila dyshohet nga inteligjenca amerikane për lidhje me shërbimet e inteligjencës së Pekinit. Nvidia ka nisur një hetim të brendshëm për të përcaktuar nëse drejtori i saj ekzekutiv ka qenë objektiv i një operacioni të huaj të inteligjencës.

 

Sipas The Wall Street Journal, bordi drejtues i Nvidia-s po shqyrton mundësinë e largimit të Huang nga posti i drejtorit ekzekutiv. Pas publikimit të raportimeve, aksionet e kompanisë ranë me rreth 8 për qind në tregtimin pas mbylljes së bursës, duke shkaktuar humbje të konsiderueshme në vlerën e saj të tregut.

 

Ndërkohë, autoritetet amerikane po shqyrtojnë edhe dyshimet për transferimin e procesorëve të avancuar të Nvidia-s drejt Kinës. Kompania ka deklaruar se nuk ka arsye të besojë se sekretet e saj tregtare apo siguria kombëtare amerikane janë komprometuar.

 

Huang, i cili bashkëthemeloi Nvidia-n në vitin 1993, mbetet në krye të kompanisë, ndërsa hetimet dhe diskutimet për të ardhmen e tij vazhdojnë.