Ohër – Strugë, peshkimi i ndaluar, peshku i Ohrit është ofertë ekskluzive në restorante

Peshkimi është i ndaluar, dhe peshku i Ohrit është ofertë ekskluzive në restorantet buzë liqenit. Ndonëse është në fuqi moratoriumi i peshkimit, në liqenin e Ohrit nuk ka asnjë koncesionar dhe peshkatar. OJQ-të thonë se për këtë arsye liqeni është mbushur me hajdutë peshqish, të cilët në garë për fitim po shkatërrojnë stokun e peshkut, duke mos u kujdesur për mbijetesën e peshqve, disa prej të cilëve janë fosile të gjalla. Nga ana tjetër, policia kryen kontrolle të shpeshta aksionale për të luftuar këtë dukuri. Vetëm në 3 muajt e parë të këtij viti janë gjetur dhe konfiskuar 227 rrjeta peshkimi, ndërsa ndaj katër personave janë ngritur kallëzime penale.

 

“Nga kontrollet e tyre të kryera në ujërat e liqenit të Ohrit dhe në bregdet, janë gjetur dhe sekuestruar 227 rrjeta peshkimi në gjatësi prej 13700 metrash me gjithsej 123 peshq të kapur, 5 kg troftë e Ohrit dhe lloje të tjera peshqish.”, tha Stefan Dimoski, zëdhënës i SPB Ohër. 

 

Shumica e aksioneve zhvillohen në bregun lindor të liqenit, ndërsa mungojnë në sferën Strugë – Kalishtë – Radozhdë, ku personat që peshkojnë pa leje veprojnë pa probleme, thonë nga organizatat joqeveritare, të cilat kërkojnë intensifikimin e kontrolleve në Strugë.

 

“Nuk ka asnjë selektivitet, nëse ato zbatohen në pjesën e Ohrit apo të Strugës të liqenit. Ato kryhen në orare të ndryshme, pjesë të ditës dhe të natës, në përputhje me informacionet e marra nga punonjësit e policisë.”, tha Dimoski.

 

Vitin e kaluar policia e liqenit ka kryer 279 kontrolle aksionale, ka sekuestruar 405 rrjeta peshkimi në një gjatësi prej 26 km me 300 kg peshk. Shtatë persona janë akuzuar për peshkim të paligjshëm.