Vazhdon agresioni ushtarak rus, Zelenski: Rusia po synon të gjithë Evropën

Një varr masiv me dhjetëra trupa civilësh është gjetur në fshatin Buzova pranë Kievit, pasi forcat ruse u tërhoqën nga zonat në veri të kryeqytetit, bjnë të ditur zyrtarët e Ukrainës. Taras Didych, kreu i komunitetit Dmytrivka që përfshin Buzovën, tha se trupat u gjetën në një gropë pranë një stacioni karburanti.

 

Kombet e Bashkuara kanë qenë në gjendje të konfirmojnë më shumë se 1700 vdekje civile në Ukrainë. Por, numri aktual i të vdekurve besohet të jetë shumë më i lartë. Presidenti ukrainas, Volodymyr Zelensky tha se Rusia po synon të gjithë Evropën me agresionin e saj dhe se ndalimi i pushtimit të Ukrainës është thelbësor për sigurinë e të gjitha demokracive.   

                                                          

"Kur tirania ka filluar agresion kundër gjithçkaje që e mban paqen në Evropë patjetër të reagohet menjëherë. embargoja e naftës duhet të jetë hapi I parë në nivel të gjitha demokracive. Atëherë Rusia do ta ndjej atë, do të jetë argument për të kërkuar paqen dhe të ndërpresin dhunën e pakuptimt.  Kjo është arsyeja pse nuk është vetëm detyrë morale e të gjitha demokracive, të gjitha forcave të Evropës, të mbështesin dëshirën e Ukrainës për paqe", u shpreh presidenti i Ukrainës, Volodymyr Zelensky.

 

Zelensky poashtu falënderoi liderët e Britanisë dhe Austrisë për vizitat e tyre të shtunën në Kiev, dhe premtimet për mbështetje të mëtejshme. Ai falënderoi gjithashtu presidentin e Komisionit Evropian dhe kryeministrin e Kanadasë për një ngjarje globale për mbledhjen e fondeve që solli më shumë se 10 miliardë euro për ukrainasit që kanë ikur nga shtëpitë e tyre. Ndërkohë Rusia ka tërhequr trupat e saj nga pjesa veriore e vendit, rreth Kievit, dhe është fokusuar në rajonet e Luhansk dhe Donjeck në lindje të njohura si Donbas.

 

Imazhet satelitore treguan një kolonë 13 kilometra me automjete ushtarake që u drejtuan në jug drejt rajonit të Donbasit përmes qytetit ukrainas Velykyi Burluk. Forcat ruse qëlluan me predha në rajonet Luhansk dhe Dnipro në orët e hershme të 10 prillit, duke goditur disa ndërtesa. 

 

Një shkollë dhe një ndërtesë shumëkatëshe u granatuan në qytetin Sievierodonetsk në rajonin e rrethuar të Luhansk. Guvernatori tha gjithashtu se banorët e Luhanskut do të kenë nëntë trena për të dalë nga rajoni ku, sipas zyrtarëve ukrainas, janë shtuar granatimet ditët e fundit.