ShBA shpalli “non grata” Gruevskin dhe Mijallkovin

Përveç Gruevskit dhe Mijalkovit, Departamenti i Shtetit ka futur gjithashtu në listën e zezë anëtarët e familjes së tyre të ngushtë, duke i bërë të gjithë të pakualifikuar për të hyrë në Shtetet e Bashkuara. Ndërkaq ish-kryeministri dhe aktualisht azilkërkues në Budapest, Nikolla Gruevski beson se qeveria aktuale ka lobuar në administratën amerikane në vendimin e sotëm që ai të futet në listën e zezë të Shteteve të Bashkuara. Ai shpreh keqardhje për vendimin e Departamentit Amerikan të Shtetit. Sipas tij, akuzat janë informacione të pasakta. 

 

Ka reaguar edhe Sasho Mijallkov, në profilin e tij të Facebook, pasi Departamenti Amerikan i Shtetit futi në listën e zezë atë dhe Nikolla Gruevskin. 

 

“Më vjen keq për vendimin e sotëm të Departamentit të Shtetit dhe mendoj se nuk është i drejtë. Vendimi bazohet në ndërtime dhe dezinformata që me kalimin e kohës do të rezultojnë të paqëndrueshme. Unë gjithmonë i kam mbrojtur dhe do t’i mbroj interesat e Maqedonisë. Besoj se drejtësia do të fitojë dhe vendimi i administratës amerikane do të korrigjohet”,- ka shkruar Mijallkov. 

 

Gruevski iku në Hungari në nëntor 2018, ku tani ka azil politik. Mijallkov u dënua me 12 vjet burg për përgjime masive dhe 8 vjet në shkallë të parë për rastin e blerjes së pajisjeve për përgjim.