Nuk ka marrëveshje për ndërprerjen e grevës, qeveria fton SAShK-un të pranojë rritjen prej 10 %

Numri një i dikasterit të arsimit, Jeton Shaqiri, konfirmoi se ka pasur takim me kreun e Sindikatës, Jakim Nedellkov, dhe paralajmëroi se në seancën e Qeverisë do të diskutohet për grevën në arsim dhe konkluzat e seancës do t’i dërgohen SAShK-ut.

 

Ai bëri thirrje edhe një herë që greva të ndërpritet dhe të pranohet oferta për 10 për qind rritje të pagave duke pasur parasysh gjendjen e krizës në të cilën ndodhet vendi. Ai më tej potencoi se negociatat vazhdojnë dhe se në interes të fëmijëve  është t’u kthehen bankave shkollore. 

 

 

“Sa i përket procesit arsimor, dua që sa më shpejtë të fillojë, që nga dita e nesërme. Për këtë temë negociatat do të mundet t’i vazhdojmë çdo ditë, por nuk dua pasoja mbi procesin arsimor. Nga SAShK-u thanë se 95 për qind prej anëtarësisë nuk pranojnë rritjen e pagave për 10 për qind vetëm 5 për qind pranojnë. Por, nëse i kthehemi viteve të kaluara, 10 përqindëshi është përqindja më e lartë e ofruar deri më tani.”,- deklaroi ministri i arsimit, Jeton Shaqiri.

 

 

Ndërkohë, Qeveria e Maqedonisë së Veriut shqyrtoi dhe miratoi informacionin për gjendjen në shkollat e mesme dhe fillore e nxitur na greva e punonjësve. Ata shtojnë se kanë formuar grup punues i cili do të nisë proces të bisedimeve për marrëveshje kolektive me sindikatat edhe për metodologjinë e rritjes së vazhdueshme të pagave në arsimin publik. Ata u bëjnë thirrje drejtorëve, mësimdhënësve dhe edukatoreve të vazhdojë me punën dhe të pranojnë rritjen e ofruar prej 10 për qind.

 

“Me konkludimet e kësaj pike, Qeveria e caktoi MASh, MPPS-në dhe Ministrinë e Financave që me rebalancin e buxhetit të parashihen mjete për rritje të pagave në arsimin fillor dhe të mesëm dhe mbrojtje të fëmijëve për 10%.”,- thuhet në njoftimin e Qeverisë.

 

Ndërkohë kreu i SASHK-ut, Nedellkov, tha se nëse ka propozim të ri në seancën e Qeverisë, i njëjti do të shqyrtohet nga organizatat sindikaliste dhe do të sillet vendimi a do të vijojë greva në çerdhe dhe shkolla. Greva në arsim ka hyrë në javën e dytë, ndërkohë që nga SAShK kërkojnë që pagat në arsim të rriten për 18%.