Interi zyrtarizon Lukas Podolskin

Ka nisur në mënyrën më të mirë aventura e Lukas Podolskit te Interi.

Sulmuesi kampion bote me Gjermaninë zbriti mbrëmjen e së premtes në aeroportin e Milanos ku është pritur nga qindra tifozë entuziastë.

Futbollisti është përforcimi I parë për trajnerin Roberto Mançini në merkaton e dimrit, ndërsa për tifozët zikaltër shihet si njëriu që do të zgjidhë problemet në sulmin e skuadrës.

Podolski transferohet nga Arsenali në formë huazimi, duke pranuar ofertën e klubit italian.

Ky I fundit do të paguajë 600 mijë euro për gjashtë muaj, ndërsa kjo shumë mund të shkojë në 1 milion euro, nëse skuadra do të arrijë objektivin për të siguruar një biletë për në Ligën e Kampioneve sezonin e ardhshëm.

Podolski do të nisë menjëherë përgatitjet me skuadrën e re pasi shpreson të luajë në ndeshjen e parë të kampionatit italian për vitin 2015, ku Interi përballet të martën në mbrëmje në tranfertën e vështirë kundër Juventusit.

Nëse tifozët zikalkër presin shumë nga Lukas Podolski, vetë sulmuesi do të ketë më shumë hapësira në formacion, ndryshe nga periudha e fundit me Arsenalin ku kishte shumë pak hapësira.

Pikërisht, kjo ishte dhe arsyeja kryesore që bindi Lukas Podolskin të provojë një tjetër kampionat pas atij gjerman dhe anglez.