Vetëm kontribute për grevistët, Trençevska: S’është kërcënim, por respektim i ligjit

Punonjësve të kopshteve të cilët janë në grevë, do t’u paguhen vetëm kontributet në bazë minimale. Ministrja e Punës dhe Politikës Sociale, Jovanka Trençevska, thotë se ky vendim është respektim i Ligjit e jo kërcënim ndaj grevistëve. 

 

“Nuk bëhet fjalë për presion apo shantazh, por për respektim të ligjeve dhe të Marrëveshjes Kolektive. Marrëveshja Kolektive për çerdhet, që janë nën juridiksionin e MPPS-së, përcakton qartë se çfarë duhet bërë në rast të grevës dhe çfarë është i obliguar punëdhënësi. E njëjta është e definuar edhe në Ligjin për Marrëdhëniet e Punës ku thuhet se në kushtet e grevës punëdhënësi është i obliguar që të paguajë kontribute për të gjithë grevistët, në bazën më të ulët për pagesën e kontributeve. Neni i radhës 241 i jep mundësi SASHK-ut që të sigurojë pagesën e pagës neto për të gjithë ata punëtorë që janë në grevë.”,- tha ministrja e punës dhe politikës sociale, Jovanka Trençevska.

 

Ministrja thotë se nëse nënshkruan pagesën e pagave për grevistët, mund të përballet me akuza penale.

 

“Unë si ministre duhet të respektoj Ligjin dhe Kontratën Kolektive. Gjithçka jashtë Ligjit për Marrëdhënie Pune do të ishte  shpërdorim i pozitës zyrtare dhe duke qenë se ka të bëjë me implikime fiskale, do të thotë përgjegjësi penale.”,- u shpreh Trençevska.

 

Sipas ministres, në 29 çerdhe punëtorët nuk janë në grevë. Në çerdhet e tjera të gjithë fëmijët pranohen, megjithëse thotë se edhe atje ka pjesë të objekteve që janë të mbyllura.