Sinoptikët: deri të premten valë e re e të ftohtit

Sinoptikanët thonë se gjatë natës mund të ketë reshje të dobëta të borës, të cilat në lartësitë malore mund të arrijnë një shtresë të hollë deri në 3 cm, por i ftohti me erëra të fuqishme në drejtim të veriut do të jetë prezent deri të premten.

 

Fundjava do të jetë e ngrohtë me temperatura prej 3 deri në 12 gradë celsius.

 

“Gjatë ditëve të ardhshme do të mbretërojë mot i thatë, por më i ftohtë, veçanërisht në orët e mëngjesit, ku temperatura do të lëviz nga minus 15 deri në minus një. Gjatë ditës do të ketë rritje të vogël të temperaturave. Nga e premtja pritet që temperaturat të rriten gradualisht, si gjatë mëngjesit ashtu edhe gjatë ditës. Do të thotë se do të kemi mot stabil pa reshje bore”- deklaroi sinoptikania, Dushanka Tanushevska.

 

Ekipet e Ndërmarrjes “Makedonija Pat” kishin dalë në teren për të pastruar rrugët kryesore të kryeqendrës.

 

Shtresë e hollë e ngricës tashmë vërehej vetëm në disa rrugica. Kjo për dallim nga ditët e shkuara nuk vështirësonte qarkullimin e qytetarëve.

 

Disa prej tyre megjithatë kishin vërejtje dhe porosi deri tek autoritet që të jenë në gjendje gatishmërie në rast se kaplojnë reshje të sërishme të borës.

 

“Duhet me e rregullu komunikacionin më së shumti për udhëtarët, se për 24 orë 28 persona kanë shkuar në spital për shkak të thyerjeve”- u shpreh një qytetar.

 

“Ftohti i madh, nxemje jo, rrymën e paguajmë aq shtrenjtë, i kanë shtuar ato çmimet, se çka kanë bë një Zot e di, as 150 volt nuk është rryma. Provo të nxehesh me rrymë nuk ka shans”- theksoi një qytetar.

 

“Megjithëse ka pasur probleme e vështirësi në lëvizje si për këmbësorët po ashtu edhe për automjetet në komunikacion, nuk pajtohem me atë se ka qenë shumë dimri i fortë. Ishin vetëm disa ditë që kishim lëvizje të vështirësuar të njerëzve, vetëm ditët e fundit, katër-pesë ditë”- tha një qytetar.

 

Autoritetet ndërkohë vazhdojnë me apelet e tyre që pa marrë parasysh motin, i cili do të mbretërojë ditëve në vijim, qytetarët vazhdimisht të jenë të përgatitur me pajisjet dimërore, me qëllim të anashkalimit të aksidenteve rrugore.