Interpelanca ndaj Xhaferit, Musliu: VMRO tenton të promovojë idetë politike

Interpelanca e ngritur kundër kryeparlamentarit Talat Xhaferi është më shumë politike se sa e argumentuar, vlerëson analisti politik Albert Musliu. Sipas tij VMRO–DPMNE pretendon vetëm të risë rejtingun politik dhe interpelanca do dështojë në mungesë të 61 votave.

 

“Nuk është interpelanca e parë të cilën VMRO–DPMNE e inicon edhe zakonisht e përdor për promovimin e ideve të saja politike, jo se ajo të cilën e inicon lidhur me zotin Xhaferi është e asaj peshe që duhet të bëhet interpelancë në parlament. Zoti Xhaferi është njëri ndër kryeparlamentarët i cili më shumë është kujdesur si për interesat ashtu edhe për rrethanat e punës të deputetëve, për ngirtjen e imazhit të parlamentit edhe pozitës së parlamentit në shoqëri, ashtu që mendoj se edhe nëse bëhet interpelanca, ajo seancë do të jetë një dëshmi e sulmeve më shumë politike, se sa sulmeve të argumentuara.”, tha Analisti Politik Albert Musliu.

 

 

VMRO–DPMNE në vazhdimësi këmbëngul që kuvendi të shpërbëhet dhe të shkohet në zgjedhje të parakohshme. Se sa interpelanca mund të jetë një element e këtij mozaiku, Musliu spjegon se është një tentim I dështuar pasi edhe për zgjedhje nevojiten shumica e votave.

 

“Zgjedhjet parlamentare shpallen me numër shumicë të deputetëve. Nëse VMRO–DPMNE nuk arrin ta siguroj shumicën për realizimin e interpelancës ndaj zotit Xhaferi, atëherë nuk besoj se do të insistoj në zgjedhje të parakohshme, së paku s’do duhet, pasiqë siç iu thash për të shpallur zgjedhjet e parakohshme prap se prap duhen 61 deputetë.”, tha Musliu.

 

Interpelanca e VMRO–DPMNE-së tanimë për disa ditë është në duart e Xhaferit. Nga kabineti i tij kanë njoftuar se seancën për interpelancë do ta thërasin në përputhje me rregulloren, pas 15 ditëve, pasi Xhaferi t’u adresojë përgjigje deputetëve. Sipas nenit 49 të rregullores, shqyrtimi i interpelancës zgjatë një ditë, derisa të gjithë deputetët e paraqitur marrin fjalën. Mbështetje ndaj interpelancës do të japin edhe dy deputetët e Së Majtës. Paknaqësi ndaj punës së kryeparlamentarit kanë shprehur edhe nga Aleanca për Shqiptarët. Deputetët e LSDM-së dhe BDI-së disa here i kanë dalë në mbështetje kryeparlamentarit duke hedhur dyshime për mos largimin e Xhaferit nga detyra.