ASh reagoi për blloqet e tarifave të energjisë elektrike

Pas publikimit të blloqeve të tarifave të energjisë elektrike nga KRRE–ja, ka reaguar Aleanca për Shqiptarët, ku i quan këto blloqe manipulime nga ana e KRRE-së.

ASH i bën apel Komisionit Rregullator të Energjisë , që gjatë përgatitjes dhe hartimit të rregullores dhe sistemit të ri tarifor, ta marrin parasysh sugjerimin e Aleancës për Shqiptarët. T’i lënë mënjanë inatet e teket personale, se në fund të fundit, janë qytetarët-konsumatorët e energjisë elektrike ata të cilët do ta paguajnë këtë kosto të papërgjegjshmërisë së KRRE-së me rritjen e çmimit të energjisë elektrike tashmë të paralajmëruar nga ana e tyre.

“Është e palogjikshme që gjigantë ekonomik dhe firma të mëdha komerciale që janë të lidhura në tensionin e mesëm të shfrytëzojnë energji elektrike të subvencionuar nga qeveria në tregun universal, ndërsa ndriçimi publik si një e mirë e përgjithshme që i shërben atij komuniteti që jeton e vepron në atë njësi të pushtetit vendor, të jetë i detyruar të furnizohet me energji elektrike në tregun liberal. Ka ardhur koha që Ministri i Ekonomisë, Kryetari i Komisionit Rregullator të Energjisë dhe faktorë të tjerë të involvuar në këtë problematikë, të marrin përgjegjësitë e tyre për këtë dështim e jo të mundohen e të justifikohen para opinionit publik me teza e teori të kota, pasi që fajtorët kryesorë për rritjen e paralajmëruar të çmimit të energjisë elektrike do të jeni pikërisht Ju, në fakt mosdija, mosprofesionalizmi, mosveprimi e moskoordinimi juaj.”,- tha deputeti i ASh-së, Elmi Aziri.