Shaqiri: Në shtator rriten rrogat e arsimtarëve për 15%

Të punësuarit në arsimin fillor dhe të mesëm në vend do të marrin paga më të larta për 15 për qind nga shtatori, tha ministri i arsimit, Jeton Shaqiri. Ai sqaroi se po pritet miratimi i rebalancit të buxhetit që të bëhet nënshkrimi i marrëveshjes përfundimtare.

“Presim të kalojë rebalanci i buxhetit për të përgatitur informacion në Qeveri, për të nënshkruar marrëveshjen përfundimtare për 15%. Bisedimet kanë marrëveshje të nënshkruar, janë dakorduar të gjitha çështjet me SAShK-un dhe pres të jetë gjithçka në rregull, të kalojë rebalanci, që nga shtatori të kemi rroga më të lartë në arsimin fillor dhe të mesëm.”,- deklaroi Jeton Shaqiri nga MASh.

Sa i përket provimit të parë të maturës shtetërore të cilit iu nënshtruan rreth 16 mijë maturantë më 4 qershor, Shaqiri tha se gjithçka ka shkuar në rregull dhe sa më parë që të jetë e mundur priten rezultatet nga qendra e provimeve.

Provimi i dytë ekstern i maturës shtetërore do të mbahet më 13 qershor me fillim në orën 10. (Vlora Latifi – Topojani, TVM2)