Zelensky i shkruan Pendarovskit: Falemnderit për përkrahjen ndaj Ukrainës

Presidenti i Ukrainës, Volodymyr Zelensky i ka kthyer letrën presidentit Stevo Pendarovski, duke e falënderuar për mbështetjen lidhur me sovranitetin dhe integritetin territorial të Ukrainës, por edhe për mbështetjen në procesin euro-integrues.

 

Zelensky thotë se shpreson që dy vendet, Maqedonia e Veriut dhe Ukraina t’i bashkohen sa më shpejtë Bashkimit Evropian. 

 

“Falënderimet e mia të përzemërta për ju personalisht, zoti President, dhe për popullin e Maqedonisë së Veriut për mbështetjen e strategjisë së integrimit evropian të Ukrainës dhe dhënien e statusit të vendit kandidat për vendin tonë, për anëtarësim në Bashkimin Evropian. Një qëndrim kaq i sinqertë i Presidentit të Maqedonisë së Veriut, i cili tashmë është vend kandidat për anëtarësim në BE, është i me rëndësie të veçantë. Shpresoj që Maqedonia e Veriut të fillojë negociatat për anëtarësim me Bashkimin Evropian sa më shpejt që të jetë e mundur. Është koha që Bashkimi Evropian të marrë vendime të rëndësishme politike. Besoj se edhe Republika e Maqedonisë së Veriut do të mund të avancojë me sukses drejt anëtarësimit në BE dhe një ditë vendet tona mike do t’i bashkohen familjes së përbashkët evropiane si anëtarë të plotë të BE-së.”, ka shkruar mes tjerash Zelensky.