Rama presion me bojkot samitit të Ballkanit Perëndimor

Kryeministri shqiptar Edi Rama, ka  pasuar deklaratën e presidentit serb Vuçiç, për të bojkotuar samitin e Ballkanit Perëndimor, më 23 qershor në Bruksel, por duke qenë më i ashpër. Duke pretenduar një refuzim tjetër nga Brukseli, kreu i qeverisë shqiptare pyet në një postim në Twitter se çfarë duhet bërë atje?  

 

“Ne diskutuam gjatë sot me liderët e Serbisë dhe Maqedonisë së Veriut për Samitin e ardhshëm të BE-së. Duket se një tjetër “Jo, më fal!” do të jetë ajo që do të dëgjojmë në fund! I gjithë Unioni i rrëmbyer nga Bullgaria nuk është një spektakël i mirë për t’u parë! Çfarë duhet bërë atje?!” pyet Rama.

 

Në samitin e Ballkanit Perëndimor pritet të marrin pjesë krerët e shteteve/qeverive të 6 vendeve të Ballkanit Perëndimor, si dhe zyrtarë të Bashkimit Europian.

 

Pak më herët, presidenti i Serbisë, Aleksandar Vuçiç, njoftoi përmes një postimi në Tëitter se ka biseduar me Kryeministrin shqiptar Edi Rama dhe atë të Maqedonisë së Veriut, Dimitar Kovaçevski, për të vendosur nëse do të marrin pjesë apo jo, në Samitin e Bashkimit Europian ku do të diskutohet edhe për nisjen e bisedimeve për anëtarësim.