Covid-19 rikthen frikën, rritje e infektimeve në Ballkan, Europë e botë

Dy nënvariantet e reja të Omicron, B.A 4 dhe 5, po rikthejnë pasiguritë e përhapin frikë në Ballkanin Perëndimor, Europë e më gjerë. 

 

Në Shqipëri, vetëm në javën e fundit janë regjistruar më shumë se 2,000 infektime të reja. Kosova, Mali i Zi, Serbia, e Bosnje-Hercegovina, që kanë konfirmuar tashmë praninë e dy mutacioneve të reja, po njohin gjithashtu rritje të infektimeve. 

 

Vetëm në 24 orët e fundit, në vendet e Bashkimit Europian u regjistruan më shumë se 27,000 raste të reja, pjesa më e madhe e të cilave në Austri, Hungari, Danimarkë, Çeki dhe Kroaci. 

 

Pas rënies së ndjeshme të infektimeve e shtrimeve, me vdekjet që po kapnin nivelet më të ulëta, mutacionet e reja që janë kthyer tashmë në mbizotëruese në pjesën më të madhe të vendeve të unionit, ka rikthyer në tryeza diskutime për kthimin e masave kufizuese, ndërsa mjekët kanë paralajmëruar për një vjeshtë aspak të qetë.