Gjendje e jashtëzakonshme në Sri Lanka, presidenti arratiset, gjen strehim në Maldive

Policia ka hedhur gaz lotsjellës në përpjekje për t’i shpërndarë protestuesit e mbledhur jashtë zyrës së kryeministrit. Në provincën perëndimore, që përfshin edhe kryeqytetin, Colombo, është vendosur  shtetrrethimi. 

 

Mijëra protestues që kanë dalë në rrugë të zemëruar javët e fundit, fajësojnë administratën e ish-presidentit Raxhapaksa për krizën më të keqe ekonomike në dekada. Për muaj të tërë, ata u përballën me ndërprerje të vazhdueshme të energjisë elektrike, si dhe me mungesa në ushqime, karburante e medikamente. Protestat i dhanë fund dinastisë së familjes presidenciale, që drejtoi Sri Lankën për dekada të tëra. 

 

Presidenti, është larguar nga vendi me një avion ushtarak, pasi u detyrua të japë dorëheqje. 

 

73-vjeçari ka mbërritur në Maldive me bashkëshorten e tij dhe dy zyrtare të lartë të sigurisë, nga ku  synon të largohet përfundimisht drejt një vendi të tretë. 

 

Drejt SHBA-së është larguar  edhe vëllai i tij, ish-ministri i Financave, Basil Raxhapaksa. Parlamenti pritet të mblidhet me 20 korrik , për të votuar presidentin e ri.