U nënshkrua protokolli ndërmjet Maqedonisë së Veriut dhe Bullgarisë

Ministri i Punëve të Jashtme Bujar Osmani dhe homologia e tij Teodora Genchovska nënshkruan sot në Sofje protokollin bilateral ndërmjet Maqedonisë së Veriut dhe Bullgarisë. Protokolli u nënshkrua pas mbledhjes paraprake të  komisionit ndërqeveritar të dy vendeve.

 

Osmani tha se nënshkrimi hap një kapitull të ri në  marrëdhëniet mes dy vendeve, e bën që bashkëpunimi të jetë më i ngushtë dhe i bazuar në besim.

 

“Për ne është një mundësi historike që pas 17 vitesh me status kandidat, RMV ka  mundësinë që nesër, pasnesër, të fillojë negociatat me BE-në, që nisin  fazën e fundit të anëtarësimit tonë në BE. Shpresojmë që ky proces bashkëpunimi me Republikën e Bullgarisë, por edhe rruga tjetër e negociatave të anëtarësimit me BE-në, do të mundësojë bashkëpunim më të ngushtë mes dy vendeve. Presim mbështetje nga Republika e Bullgarisë në këtë rrugë, e cila sapo ka filluar negociatat për anëtarësim në BE”, tha Osmani.

 

Gencovska tha se Bullgaria është vendi që mbështet më fuqishëm integrimin evropian të Maqedonisë së Veriut dhe Shqipërisë. 

 

 

Sipas saj,  tani mbetet të përmbushet ajo që është rënë dakord, e cila do të kërkojë angazhim serioz nga të dyja vendet. 

 

Me nënshkrimin e protokollit hapet rruga për mbajtjen e konferencës së parë politike ndërqeveritare të RMV-ë dhe BE-së.

 

Në Sofje si pjesë e delegacionit qeveritar, përveç ministrit Osmani, janë të pranishëm edhe zëvendëskryeministri për çështje evropiane Bojan Mariçiq, ministrja e Kulturës Bisera Kostadinovska Stojçevska, ministri i Ekonomisë Kreshnik Bekteshi, si dhe ministri i Transportit dhe Lidhjeve, Blagoj Bochvarski.