Filipine, tërmet me magnitudë 7.0, ka viktima e të lënduar

Një tërmet i fortë me magnitudë 7.0 gradë të shkallës Rihter goditi ishullin Luzon në Filipine, duke dëmtuar një spital dhe ndërtesa. Tërmeti ka shkaktuar nga lëvizja e një çarje lokale në një thellësi prej 25 kilometrash. Ndikimi i tërmetit u ndje në kryeqytetin Manila, më shumë se 400 kilometra larg, ku punëtorët dhe banorët evakuuan ndërtesat dhe u mblodhën në rrugë. Numri i të vdekurve aktualisht është 4, por është në rritje të vazhdueshme, ndërsa janë mbi 60 të lënduar. Një spital në provincën Abra u evakuua pasi u shemb pjesërisht, por autoritetet thanë se nuk kishte viktima. Pamjet tregojnë edhe momentin kur shembet kambanorja e kishës, ndërsa njerëzit ikin. 

 

“O Zot kjo ishte vërtetë e tmerrshme, goditjet ishin shumë të forta.”,- tha një grua. 

 

Presidenti i Filipineve, Ferdinand Marcos Jr., urdhëroi dërgimin e menjëhershëm të ekipeve të shpëtimit dhe ndihmës në Abra.

 

“Tërmeti ishte më i fortë se zakonisht, ne kemi dërgua menjëherë ekipet e shpëtimit e të ndihmës në zonat më të rrezikuara, por deri tani mendoj se është bërë gjithçka që mund të bëhet.”,- u shpreh presidenti i Filipineve, Ferdinand Marcos Jr..

 

Shërbimi Gjeologjik i SHBA-së raportoi se epiqendra e tërmetit ishte 11 kilometra në juglindje të qytetit të Dolores dhe në një thellësi prej 10 kilometrash. Fillimisht u lajmërua për një magnitutë 7.3 por më pas u korrigjua në 7. Sipas autoriteteve ne Filipine janë raportuar 58 rrëshqitje dheu dhe 218 qytete në 15 provinca janë prekur nga tërmeti po ashtu janë shkatërruar tri ura në Abra.