Besnik Hasi, trajner i vitit në Belgjikë

Trajneri i Anderlechtit, me të cilin u shpall kampion, ka fituar votimin e fshehtë të trajnerëve të klubeve të elitës belge të futbollit. Atij iu dha çmimi në një mbrëmje gala të organizuar nga liga elite e futbollit belg, e njohur si “Jupiler League”.

Ndryshe, Hasi është fituesi i edicionit të 61-të të kësaj lige, duke bërë krenarë të gjithë shqiptarët, pasi është i pari trajner shqiptar që arrin suksese kaq të mëdha.

Mes tjerash, 43 vjeçari nga Gjakova, I cili është në krye të Anderlehtit prej marsit të vitit të kaluar, pasi pranoi këtë çmim, në fjalimin e tij nuk harroi as fjalët shqipe.

Hasi së pari falënderoi skuadrën e Anderlecht-it dhe lojtarët e tij, ndërsa më pas ndau një falënderim të veçantë edhe për familjen e tij, por këtë herë në gjuhën shqipe.

“Laureta, Dea dhe Lea ju dua shumë. Pa ju nuk kisha arrit këtu kurrë”, u shpreh Hasi gjatë fjalimit të tij në këtë ceremoni.