Droga e kapur në Elbasan dhe reagimet

Operacioni ka sjellë arrestimin e 11 personave, ndër të cilët edhe nipi i ish-diktatorit, Enver Hoxha dhe 2 kolumbianë.

 

121 kilogramë është sasia e kokainës së sekuestruar, si dhe disa qindra mijëra euro. 

 

Ministri i Brendshëm, Saimir Tahiri, pas inspektimit të laboratorit deklaroi se ai ishte më i madhi në Ballkan dhe se policia e shtetit do të vazhdojë punën për të zhdukur trafikun e drogës.

Reagimet nga politika, por edhe nga familjarët e ish-diktatorit kanë qenë të shumta.

 

Ndërsa Rama ka vlerësuar në maksimum operacionin në rrjetet sociale, ish-kryeministri Berisha deklaroi se baroni i drogës, Ermal Hoxha, ka lidhje të drejtpërdrejtë me Edi Ramën. Përpos kësaj, Berisha e vlerësoi Policinë e Shtetit.

 

Ndërsa prindërit e Ermal Hoxhës, Ilir dhe Teuta Hoxha, duke folur për pafajësinë e të birit, u shprehën se arrestimi është bërë me qëllim diskreditimin e figurës së ish-udhëheqësit, Enver Hoxha.

 

Sipas policisë, nëse do të hidhej në treg kokaina e sekuestruar, do të kapte vlerën e rreth 40 milionë eurove.