Porfirije kaloi kufirin pa kontroll, dorëhiqet shefi i policisë kufitare, Vasko Akoviç

Pas njoftimeve se patriarku serb Porfirije ka hyrë në Mal të Zi  një ditë më parë për të nënshkruar marrëveshjen kontraverze me kryeministrin Abazoviç, pa u kontrolluar dhe pa u evidentuar, shefi i policisë kufitare, Vasko Akoviç, ka dhënë dorëheqjen.

Nuk ka pasur asnjë reagim nga qeveria e cila tashmë është nën ankthin e përballjes brenda këtij muaji  me një mocion mosbesimi të iniciuar tashmë  nga Partia Demokratike e Socialistëve e presidentit Millo Gjukanoviç.

Abazoviç përballë mocionit të mosbesimit, inicuesve iu mungojnë votat e 5 deputetëve

36 deputetë kanë paraqitur në procedurë parlamentare mocionin  për shkarkimin e Abazoviç nga posti i kryeministrit. Demokratët Socialistë , thonë se kryeministri ka shkelur interesat kombëtare të Malit të Zi.

Sipas partisë më të madhe në vend, marrëveshja me Patriarkanën e Beogradit do të shfuqizohet nga qeveria e re. Edhe Partia Socialdemokrate , pjesë e  koalicionit qeverisës,  jo vetëm që është e vendosur për shkarkimin e Abazoviç, por madje e quajnë - iniciativë të vonuar.

Mbështetje kanë edhe nga Partia Liberale ,  Socialdemokratët ,  dhe Bashkimit Demokratik i Shqiptarëve,  të cilat gjithashtu vlerësojnë se mungesa e rezultateve të Qeverisë në drejtim të zbatimit të prioriteteve që u përcaktuan gjatë zgjedhjes së saj, kulmoi me nënshkrimin e  marrëveshjes me Kishën Ortodokse Serbe.

Për rrëzimin e qeverisë kërkohet shumica prej 41 deputetësh pra, partive iniciuese të mocionit të mosbesimit, ju duhet të sigurojnë aktualisht edhe  votat e  të paktën pesë deputetëve të tjerë.

Dritan Abazoviç ishte politikani i parë në rajon që i bëri mbledhjet e qeverisë transparente për publikun, por firmosja në fshehtësi e një marrëveshjeje kaq të kontestueshme, si kjo me Kishën Ortodokse dhe Serbe, bëri që ai të cilësohet tradhëtar i kombit. (Armend Murseli, TVM2)