Vizita e parë në Mal të Zi e Hashim Thaçit

Nën masa të larta sigurie, Thaçi u prit nga përfaqësues më të lartë të këtij shteti. Takimin e parë në këtë shtet Thaçi e realizoi me homologun e tij malazez, Igor Lukshiq.

 

Dy bashkëbiseduesit kanë theksuar nevojën e thellimit të bashkëpunimit midis dy vendeve fqinje në fusha të ndryshme ekonomike, infrastrukturore dhe kulturore, si dhe shkëmbimin e përvojave që kanë të bëjnë me proceset integruese në strukturat euroatlantike.

 

“Kemi raporte të shkëlqyeshme dhe perspektivë të sigurt evropiane”- tha ministri i Punëve të Jashtme të Republikës së Kosovës, Hashim Thaçi.

 

Vila rezidenciale “Gorica” në Podgoricë, ku delegacioni i Kosovës zhvilloi takimet, ishte e rrethuar nga qindra policë të njësive speciale malazeze për të siguruar që vizita të kalojë pa incidente. 

 

Thaçi realizoi takime edhe me kryeministrin, Milo Gjukanoviq,  kryetarin e parlamentit, Ranko Krivokapiq, si dhe me presidentin malazez, Filip Vujanoviq. Pasditen e sotme zëvendëskryeministri Thaçi  qëndroi  edhe në Ulqin për të realizuar agjendën e takimeve të parapara me përfaqësuesit shqiptarë në Malin e Zi. 

 

Ditë më parë, mediat malazeze raportuan që policia e shtetit ka ngritur në nivelin më të lartë të mundur sigurinë e burrështetasit kosovar, me atë që do të ketë përgjegjësinë maksimale për të ruajtur shefin e diplomacisë kosovare, Hashim Thaçin.

 

Madje, mediat malazeze kanë thënë se masat e sigurisë u shtuan edhe si rezultat i të dhënave që shërbimi sekret malazez ka mbledhur, që diplomati shqiptar, Hashim Thaçi, mund të jetë edhe objekt i një atentati nga qarqet shoviniste serbe.