Reciprociteti, Serbia me njoftime në kufi se nuk e njeh pavarësinë

Një ditë para fillimit të reciprocitetit, në të gjitha pikat kufitare që çojnë nga Kosova në Serbi janë vendosur shënime në të cilat thuhet se mundësia e përdorimit të kartave të identitetit të Kosovës është bërë ekskluzivisht për arsye praktike, për të lehtësuar qarkullimin e qytetarëve, dhe se nuk mund të interpretohet si njohje e pavarësisë së Kosovës.

Sipas këtyre tabelave, pranimi i dokumenteve të lëshuara nga Republika e Kosovës nuk duhet të interpretohet si njohje nga Serbia.

Në këto njoftime gjithashtu theksohet që përdorimi i kartave të identitetit të lëshuara nga Prishtina nuk mund të interpretohet si pëlqim i Beogradit për devijimin nga Rezoluta 1244 e Këshillit të Sigurimit të OKB-së.

Vendosja e tabelave,  vjen 24 orë para se të hyjë në fuqi marrëveshja për dokumente e 27 gushtit mes Kosovës dhe Serbisë për qarkullimin e lirë të shtetasve të dy vendeve.

Më 1 shtator hyn në fuqi vendimi për riregjistrimin e makinave që kanë targa të lëshuara nga Serbia. Vlerësohet se në veri të Kosovës, të banuar me shumicë serbe, qarkullojnë 10.000 makina me targa me akronime të qyteteve të Kosovës – sikurse PR, PZ, KM, UR e të ngjashme – të cilat Kosova i konsideron të paligjshme.

Qeveria e Kosovës ka thënë se nga 1 shtatori deri më 31 tetor, qytetarët që kanë makina me targa të tilla do të mund t’i riregjistrojnë ato në targa RKS – Republika e Kosovës.

Serbia ka kërkuar që serbët në veri të Kosovës të përdorin targa KS – që kanë status neutral ndaj shtetësisë së Kosovës – por, kryeministri Kurti ka hedhur poshtë një propozim të tillë. (Gyltene Sinani, TVM2)