Ilir Meta për vizitë në Maqedoni
Kryetari i Parlamentit shqiptar Ilir Meta sot dhe nesër do të qëndrojë për vizitë zyrtare në Republikën e Maqedonisë,me ftesë të kryetarit të Kuvendit të Maqedonisë, Trajko Veljanovski...
Siç kumtoi shërbimi i kuvendit për informim, kryetari i Parlamentit shqiptar do të realizojë takim me nikoqirin e tij Veljanovski, ndërsa më pas edhe fjalim para deputetëve në Kuvendin e Maqedonisë.
Mysafiri shqiptar në suaza të vizitës pritet të realizojë takime edhe me presidentin e shtetit Gjorge Ivanov dhe me kryeministrin Nikolla Gruevski.
Kryetari i Parlamentit shqiptar në suaza të vizitës do të takohet me përfaqësuesit e udhëheqëseve të BDI-së, PDSH-së dhe LSDM-së.
Është paraparë që ai të takohet me Orhan Ibraimin, kryetar i grupit të deputetëve të Kuvendit të Maqedonisë për bashkëpunim me Parlamentin e Shqipërisë dhe anëtaret.
Në takimet në Shkup, Meta do të shoqërohet nga pesë deputetë anëtarë të Grupit të Parlamentit shqiptar për miqësi me Kuvendin e Republikës së Maqedonisë.
Kjo është vizitë kthyese e Metës në Maqedoni. Kryetari i Kuvendit të Republikës së Maqedonisë, Veljanovski ishte për vizitë në Tiranë në dhjetor të vitit 2013.