Luftimet në Ukrainë, Rusët godasin një digë në vendlindjen e Zelenskyt

Zyrtarët në qytetin jugor të Ukrainës, Kryvyi Rih, thonë se 112 shtëpi janë përmbytur pasi raketat ruse goditën një digë të madhe rezervuari në vendlindjen e presidentit Zelensky.

Banorëve të rreth 22 lagjeve iu kërkua të evakuohen, tha kreu i qytetit Oleksandr Vilkul. Mirëpo nuk u raportua për viktima. Vilkul deklaroi se gjatë natës rusët goditën dy herë digën porse situata tani ishte “nën kontroll”. Ukraina tha se sulmi ishte hakmarrje nga Rusia për kundërsulmin e saj të fundit.

Zelensky: Rusia është “shtet terrorist”

Presidenti Volodymyr Zelensky e përshkroi Rusinë si një “shtet terrorist” pas sulmit të së mërkurës në rezervuarin Karachunivske. “Ju jeni të dobët që luftoni civilët”, tha Zelensky duke iu drejtuar rusëve e i cili ka lindur në Kryvyi Rih, në fjalimin e tij natën e mërkurës.

“Të poshtrit që, pasi janë arratisur nga fusha e betejës, po përpiqen të bëjnë dëm nga diku larg”, shtoi ai.

Në fjalimin e tij, Zelensky tha se rezervuari “nuk kishte fare vlerë ushtarake”.