Xhaferi: Shumica parlamentare është stabile

Shumica parlamentare është stabile dhe numëron 64 deputetë. Përkundër fërkimeve brendapartiake, Bashkimi Demokratik për Integrim ka vetëm një grup parlamentar dhe asnjë deputet i saj nuk ka ndryshuar statusin.

Xhaferi: Asnjë deputet i BDI-së s’ka ndryshuar status

Në takimin e regullt me gazetarë, kryeparlamentari Talat Xhaferi tha se deri tani nuk ka asnjë njoftim se ndonjë deputet i BDI-së ka ndryshuar statusin në deputet të pavarur.

“Është e drejta e secilit të deklarojë statusin e tij si deputet, dhe kjo është zgjedhje e lirë. Statusi zyrtar është deputetë të Bashkimit Demokratik për Integrim.”- tha Xhaferi.

Nuk deshi të komentojë zhvillimet në BDI, por theksoi se qëndron në anën e partisë.      

Xhaferi: VMRO bojkoton koordinimet

Sa i përket funksionimit të Kuvendit dhe veprimit politik të opozitës së kryesuar nga VMRO DPMNE, Xhaferi tha se nuk ka komunikim me opozitën.

Koordinatori i grupit parlamentar i VMRO DPMNE-së nuk shkon në koordinimet e regullta, ndërkaq nuk realizohen as takime joformale pasi, siç tha, ato keqpërdoren.

Nisma e së Majtës për referendum ende nuk është dorëzuar në Kuvend, konfiroi Xhaferi.

Xhaferi: Vendimet për krizën energjetike, të premten

Ndërkaq, vendimet për vazhdimin e gjendjes së krizës energjetike dhe asaj për ngrohje do të vihen në seancë plenare gjatë ditës së premte dhe pritet të miratohen deri në mesnatë. (Shpëtim Nuredini, TVM2)