“Vizer” edhe pesë linja të reja të fluturimit drejt Evropës

Bëhet fjalë për destinacionet Shkup-Barcelonë, Shkup-Oslo, Shkup-Hamburg, Shkup-Fridrihshafen dhe Ohër-Bazel. Fluturimet në këto destinacione do të nisin të realizohen nga fundi i qershorit dhe në fillim të korrikut.

Zëvendësdrejtori i “Vizer”, Xhon Stivenson, u shpreh se me rritjen e kuotës së “Vizerit” në Shkup dhe Ohër krijohen gjithnjë e më shumë mundësi për të udhëtuar dhe përzgjedhje më e madhe e destinacioneve.

“Shpresojmë se kjo do të rezultojë me krijimin e më shumë vendeve të punës në nivel lokal dhe akoma më shumë do të rrisë turizmin në vend. Presim që linjat e reja të mirëpriten nga qytetarët, duke pasur parasysh vetë faktin se atyre u mundësojmë edhe fluturime me tarifa të ulëta”- deklaroi zëvendësdrejtori i “Vizer”, Xhon Stivenson.

Linjat e reja të “Vizerit” janë në pajtim me marrëveshjen që kjo kompani e nënshkroi me Ministrinë e Transportit dhe Lidhjeve më 15 janar. Ministri i Transportit dhe Lidhjeve, Mile Janakievski, potencoi se nëpërmjet subvencionimit të linjave ajrore, në vitin 2013 numri i udhëtarëve është rritur për 236%, ndërsa vitin e kaluar janë transportuar mbi 500.000 udhëtarë, apo 50% më shumë në krahasim me 2013-ën.

“Me linjat e reja të fluturimeve dhe biletave të reja mundësuam që të vizitohen qytet më atraktive në Evropë. Mundësuam që qytetarët e Maqedonisë të ndjekin ngjarjet botërore të sportit, manifestimet kulturore, ndërsa biznesmenët të zgjerojnë kontaktet e tyre”- tha ministri i Transportit dhe Lidhjeve, Mile Janakievski.

Për të promovuar linjat e reja ajrore, nga Kompania “Vizer” në bashkëpunim me koncesionarin e aeroporteve të Maqedonisë “TAV”, organizuan fluturim special falas për 50 persona të Shtëpisë për Fëmijë pa Prindër “11 Tetori” nga Aeroporti “Aleksandri i Madh” deri në hapësirën ajrore mbi liqenin e Ohrit. (Meral Ismaili, TVM2)