Liberalizimi i vizave për Kosovë, Burjani: Kushtet teknike janë plotësuar

Kosova është shumë afër liberalizimit të vizave me Bashkimin Europian. Optimizmi është rritur sidomos pas deklaratës së ministres gjermane për Europë, Anna Lührmann, e cila pohoi se liberalizimi duhet të ndodhë këtë vit. Lidhur me këtë është më i qartë dhe i prerë ishte anëtari i Komisionit të Integrimeve Europiane, Agon Batusha, i cili shpreson për lajme pozitive pas 13 tetorit. Analisti, Blerim Burjani, për TVM2 ka pohuar se Liberalizimi i vizave është jetik në kuptim e lëvizjes së lirë dhe sipas tij Kosova ka përmbushur të gjitha kushtet e parapara.

 

“Deri më tani Kosova kishte plotësuar të gjitha kushtet teknike të parapara sipas rregullativës së BE-së. Ndërsa tani po vjen  një situatë kur BE-ja duhet ta japë qëndrimin saj  të plotë rreth liberalizimit të vizave me Kosovën. Përveç çështjeve teknike të cilat Kosova i ka plotësuar kohë më parë tash BE-ja është në situatën kur duhet të kërkojë  edhe përkrahje politike dhe votim nga  Komision i  Bashkimit Europian. Asnjëherë më parë nuk ka qenë më afër liberalizimi i vizave për Kosovën, dhe të gjitha kushtet e krijuara politike me Bashkimin Europian janë në dobi të Kosovës.”,- tha analisti politik nga Kosova, Blerim Burjani.

 

Pro Liberalizimit të vizave me Kosovën janë shprehur edhe vendet tjera të BE-së, të cilat po ashtu kanë uruar që Kosova ta tejkalojë edhe kontestin  me Serbinë për njohje reciproke, që do të mundësonte të dyja vendet të ecin në rrugën euro-atlantike. Këto shpresa u ngjallën edhe më shumë pas deklaratës së përbashkët të Francës, Gjermanisë dhe Polonisë, të cilat kanë rikonfirmuar angazhimin e tyre të plotë dhe të qartë ndaj perspektivës së anëtarësimit në Bashkimin Evropian për gjashtë vendet e Ballkanit Perëndimor. Po këto vende kanë kërkuar nga BE që të udhëheqë dialogun Kosovë-Serbi dhe kanë theksuar nevojën për një marrëveshje gjithëpërfshirëse që do të kontribuonte në stabilitetin e rajonit.