Energjetikë, kyçen 17 megavat energji diellore në Sh.Nikollë

Energji elektrike për 5500 familje do të sigurohet nga termocentrali diellor me kapacitet prej 17 megavat në rajonin e Shën Nikollës. Këto17 megavat energji diellore tashmë janë të kyçura në rrjetin elektrik. Ky kapacitet përbën prodhuesin më të madh diellor në vend dhe është një pikë kthese në transformimin e gjelbër të rajonit, theksoi Igor Koprivnikar, ndërmarrja investuese GEN-I.

 

“Çmimet e energjisë elektrike po rriten pa ndalesë, aktualisht në fund të gushtit çmimet arritën kulmin prej një mijë euro për megavat orë, prandaj edhe prodhimi vendor i energjisë elektrike nga termocentralet diellore është i një rëndësie edhe më të madhe.”, tha Igor Koprivnikar, drejtues i bordit “GEN-I”.

 

Investimi është një hap i madh në drejtim të realizimit të ambicieve të qeverisë për sigurimin e energjisë elektrike dhe burimeve të rinovueshme, theksoi kryeministri Dimitar Kovaçevski, sipas të cilit ndërmarrja “GEN-I” i ka paguar buxhetit të shtetit 2.7 milionë euro përmes konceptit të një shoqërie innovative ndërsa në këmbim ka marrë tokë në përdorim për 50 vjet.

 

“Stabiliteti në sigurimin e energjisë elektrike përmes të gjitha burimeve në dispozicion është prioriteti ynë kryesor, veçanërisht në kohët e krizës më të madhe energjetike dhe ekonomike në botë.”, tha kryeministri Dimitar Kovaçevski.

 

Me këtë investim janë përfituar 17 megavat shtesë, aq sa shtë bërë në 30 vitet e fundit në vend, tha ministri Kreshnik Bekteshi.

 

“Vetëm me këtë investim, brenda jo më shumë se 2 vjet e gjysmë, kemi 17 megavat fuqi shtesë të instaluar, që do të thotë se me vetëm një investim kemi aq sa është bërë në 30 vitet e fundit në një vend që është i njohur si vendi i diellit.”, tha ministri i ekonomisë Kreshnik Bekteshi.

 

Termocentrali diellor është kyçur në rrjet 4 muaj përpara afatit.