Korrupsioni, “mobilizim gjithëpërfshirës për luftë efikase”

Korrupsioni është detektuar si një ndër problemet kryesore të shoqërisë sonë. Për ta luftuar atë duhen reforma dhe angazhim serioz. Ministria e Drejtësisë bashkë me UNDP-në, organizuan punëtorinë e radhës kushtuar standardeve të integritetit dhe luftën kundër korrupsionit.  

 

“Në bazë të anketave të realizuara, korrupsioni është çdoherë në mesin e pesë problemeve kryesore. Për korrupsioni çdoherë kemi apeluar që duhet të flitet dhe të gjitha këto ngjarje janë tregues se vërtet për këto probleme po flitet.”,- tha anëtari i Komisionit për Parandalimin e Korrupsionit, Vladimir Georgiev.

 

Nga Ministria e Drejtësisë thonë se për luftën kundër korrupsionit, po ndërmerren hapa konkretë.

 

“Janë paraparë trajnime për zyrtarët e administratës, janë vendosur rregulla për rotacion në pozicione, kompensimi për të punësuarit në sektorin publik llogaritet përmes pikëve apo vlerës së vendit të punës. Po ashtu është rregulluar edhe domosdoshmëria e informimit për financimin e zgjedhjeve, fushatave dhe financimi i partive politike.”,- theksoi sekretari shtetëror pranë Ministrisë së Drejtësisë, Muhamed Toçi.

 

UNDP, në bashkëpunim me Ministrinë e Financave, ka lancuar platformën elektronike përmes të cilës qytetarët kanë qasje te shpenzimi i mjeteve publike.

 

“Kemi një numër prej 45 komunave të cilat rregullisht informojnë për shpenzimet buxhetore. Po ashtu është punuar edhe publikimi i bashkëpunimit të komunave me OJQ-të dhe ndarja e mjeteve komunale për këto organizata.”,- tha udhëheqësja e programit “Sundimi i Demokracisë” – UNDP, Biljana Cvetanovska Gugovska.

 

Të pranishmit konkluduan se për luftë efikase kundër korrupsionit është e nevojshme mobilizim gjithëpërfshirës, të flitet në opinion dhe të ketë qasje deri tek mjetet për informim të cilat duhet të jetë krah-përkrah në këtë luftë dhe më e rëndësishmja - transparencë nga institucionet.