Ukrainë, dronët rus sërish sulmojnë Kievin

Shpërthime të shumta goditën qendrën e Kievit, duke vrarë të paktën një person, pasi dëmtuan një ndërtesë banimi, tha kryetari i bashkisë së qytetit Vitaliy Klitschko. Shpërthimet tronditën rrethin qendror Shevchenko të Kievit.

 

Sipas Andrii Yermak, kreu i zyrës së presidentit ukrainas, forcat ruse përdorën 28 drone Shahed-136 të prodhuar nga Irani. Zyrtarët ukrainas thonë se Rusia ka përdorur vazhdimisht të ashtuquajturit dron vetëvrasës kundër objektivave ukrainas. 

 

“Tani jam në qendër të Kievit, ku një dron iranian goditi një ndërtesë banimi. Shpëtuesit tani janë në punë, zërat e njerëzve mund të dëgjohen nën rrënoja. Gjithçka e mundur është bërë për t'i nxjerrë jashtë. Ju mund të shihni llojet e objektivave që Putini zgjedh për dronët e tij luftarak, të ofruara me dashamirësi nga terroristët nga Irani. Këto janë ndërtesa banimi në qendër të Kievit”, u shpreh këshilltari i lartë presidencial ukrainas Anton Gerashchenko.

 

“E dëgjuam duke fluturuar. Ne vepronim si pjesë e një ekuipazhi, si pjesë e një ekipi. Bashkëpunëtorja jonë pa nga po fluturonin, ne shënuam objektivin. Ai po fluturonte pak më tej në drejtim të rrugës Kudryashov dhe hapëm zjarr ndaj saj. Ne u përpoqëm të mbuloheshim dhe pas kësaj pamë se ajo ndryshoi papritmas trajektoren e saj dhe shpërtheu rreth 50 metra larg nesh”, theksoi ushtari i Ukrainës.

 

Disa banorë të zonës së goditur nga sulmet ruse u zhvendosën në rajone tjera.

 

"Kam ardhur me taksi nga Brovary. U evakuova nga Berdiansk në qershor. Mora të punoja në një nga zyrat si pastruese. Sapo dola nga një taksi dhe ata nuk na lejojnë të hyjmë. u njoha me gra të tjera, ato do të shkonin në punë. Dhe teksa po kaloja këtu më thanë të shkoj në strehimore, as në zyrë nuk kam arritur. Ne ishim pranë stacionit të metrosë Chernihivska. Unë në punë, as nuk e di nëse duhet të shkoj atje apo jo”, u shpreh banorja Natalia.

 

“Nuk e di, nuk kam numëruar. Dy me siguri. Ishte një atje, një tjetër diku tjetër. Dhe javën e kaluar isha gjithashtu në qendër dhe pashë raketat që fluturonin . shpëtimtarët  po punojnë, , policia dhe gazetarët, ata po bëjnë punën e tyre. Dhe unë jam një pensionist, thjesht jam ulur këtu”, theksoi banori i Kievit, Grygoriy.

 

Ndërkohë NATO ka nisur stërvitjet e rregullta për mbrojtje bërthamore në Evropën Perëndimore, në kohën e rritjes së tensioneve me Rusinë, të nxitura nga kërcënimet e presidentit rus, Vladimir Putin.

 

“Stërvitjet përfshijnë 14 shtete dhe mbi 60 lloje të pajisjeve, përfshirë aeroplanët luftarakë të kategorisë së katërt dhe pestë, si dhe pajisjet për vëzhgim”, ka thënë aleanca 30-anëtarëshe përmes një deklarate, duke shtuar se këto "aktivitete rutinore” – që zgjasin deri më 30 tetor – kanë qenë të planifikuara edhe para nisjes së luftës në Ukrainë dhe nuk janë të lidhura me situatën aktuale.

 

Stërvitjet do të zhvillohen mbi Belgjikë, Britani dhe Detin Verior.