Kufizim i kamatave të përmbaruesve, Zyberi: Qytetarët e paguajnë borxhin shumëfish

Përmes iniciativës për ndryshime në Ligjin për Marrëdhënie Detyrimore dhe Ligjin për Ndërmjetësim, të dorëzuar në Qeveri, Avokati i Popullit kërkon që të ndërpritet praktika që debitorët të jenë robër të kamatave dhe interesave para përmbaruesve. Si rezultat i parashtresave të shumta nga ana e qytetarëve në këtë fushë, Avokati i Popullit propozon që kamata ndëshkuese tek përmbaruesi të mos jetë më e madhe se sa borxhi kryesor. 

 

“Pa përkufizimin-limitimin e kamatës ndëshkuese, qytetarët nuk mund të lirohen nga borxhet që kanë se nuk janë në gjendje të paguajnë menjëherë borxhin. Kjo në fakt i shndërron qytetarët në debitor të përjetshëm në robër të kamatave dhe interesave para përmbaruesve. Interesi ndëshkues-kamata ndëshkuese, nuk ka limit që do të thotë në mënyrë permanente ajo rritet. Duke pasur parasysh se një person mund të ndajë 1/3 e të ardhurave dhe ato, p.sh. mund të jenë 10 mijë denarë në rastet më të mira. Pagesa e 10 mijë denarë e një rate tek përmbaruesi, mund të zgjasë 20 vite deri sa të bëhet pagesa, që do të thotë 20 vite do të ec interesi ndëshkues dhe kjo e bën shumën e pagesës që debitori e paguan kreditorit përmes përmbaruesit, është e palimituar dhe ajo shndërrohet në dyfish, trefish më shumë se sa borxhi kryesor.”,- tha avokati i popullit, Naser Zyberi.

 

Zyberi pret që Qeveria dhe deputetët të shqyrtojnë me seriozitet iniciativën në fjalë dhe e njëjta për një kohë të shkurtër të jetësohet në praktikë, posaçërisht tash në kohë krize ekonomike ku rrezikohet mirëqenia e qytetarëve.