Tensione mes dy Koreve, dy palët shkëmbejnë të shtëna në kufi

Në kohën kur frika më e madhe në Azi është ajo e një përplasjeje ushtarake për Tajvanin, një tjetër konflikt i rrezikshëm atje kërcënon rizgjimin.

Koreja e Jugut njoftoi se ka hapur zjarr në shenjë paralajmërimi ndaj një anijeje koreano-veriore që kaloi kufirin detar të vendit, dhe pala tjetër është përgjigjur në të njëjtën mënyrë.

“Koreja e Veriut po vazhdon provokimet dhe pretendimet e pamatura që minojnë paqen dhe stabilitetin në Gadishullin Korean dhe në komunitetin ndërkombëtar”, deklaroi ushtria koreano-jugore, e cila kërkoi ndërprerjen e menjëhershme të këtyre veprimeve.

Tensionet janë rritur sërish mes dy vendeve sidomos javët e fundit kur Peniani ka kryer disa testime armesh, përfshirë edhe ato që pretendon se janë stërvitje taktike bërthamore.

Në kundërpërgjigje, Seuli dhe Uashingtoni kanë kryer stërvitje të përbashkëta ushtarake, e kjo e ka acaruar se tepërmi veriun komunist.

Procesi i bisedimeve dypalëshe ka ngecur në vendnumëro, e aktualisht, raportet mes dy Koreve janë në pikën më të ulët të viteve të fundit.