Në veri serbët braktisin punën, në jug vazhdojnë si çdo ditë tjetër

Pjesëtarët serbë të Policisë së Kosovës, për dallim nga ata në veri të Republikës, në pjesën tjetër të vendit vazhdojnë punën normalisht.

Në komunën e Shtërpcës, ku shumica e banorëve janë të nacionalitetit serb, puna në polici vazhdon si çdo ditë tjetër, edhe pas vendimit të së shtunës ku Lista Serbe vendosi të lëshojë institucionet e Kosovës e pjesëtarë serbë të policisë hoqën uniformat.

Disa pjesëtarë serbë të Policisë së Kosovës, prapa kamerës thanë për RTK-në se asnjë polic nuk është duke bojkotuar punën në këtë pjesë të vendit.

RTK ka provuar të marrë një deklaratë nga Zyra për Medie e Policisë në Ferizaj por ata nuk janë përgjigjur për shkak që siç kanë thënë u duhet leje nga Zyra Qendrore e Policisë së Kosovës, në Prishtinë.

Po ashtu RTK ka adresuar një kërkesë në Zyrën për medie të policisë në Prishtinë për të kuptuar se sa është numri total i policëve që po bojkotojnë institucionet e Republikës së Kosovës, por ata nuk janë përgjigjur.