Kërçova shënoi 40 vjetorin e bashkimit politik për çlirim dhe bashkim kombëtar

Në organizim të Shoqërisë Lëvizja dhe komunës së Kërçovës, mbrëmë në Qendrën për Kulturë në Kërçovë u mbajtë Akademia e mirënjohjes kushtuar 40 vjetorit të bashkimit të organizatave politike në përpjekjet për liri e bashkim kombëtar, ku mori pjesë edhe lideri i BDI-së Ali Ahmeti, familje dëshmorësh, veteranë të luftës, të burgosur politik dhe veprimtarë nga Kosova dhe Maqedonia.

 

Bashkimi i organizatave patriotike shqiptare është një ngjarje e rëndësishme e organizimit politik që bëri kthesën e madhe në Lëvizjen Kombëtare dhe hapi rrugën e çlirimit dhe bashkimit kombëtar. Rikujtimi i 40 vjetorit të organizimit të LPK duhet të vlersohet, sepse kjo që përkujtojmë sot nuk ka ardhur nga qielli por falë atyre gjeneratave që sakrifikuan jetën për idealet kombëtare, potencoi lideri i BDI-së Ali Ahmeti, i cili me këtë rast e përgëzoi Këshillin inicues për organizimin e këtij manifestimi përkujtimor të mirënjohjes ndaj atyre që bënë aq shumë për këtë që ne po përjetojmë sot.

 

Për rolin dhe rëndësinë e bashkimit të organizatave politike, folën edhe kryetari i Kërçovës Fatmir Dehari dhe veprimtarët Hasan Bekteshi, Musa Demiri, Xhevat Bislimi dhe Ismail Latifi.

Në fund të manifestimit, Shoqëria Lëvizja u ndau mirënjohje veprimtarëve që kontribuan në organizimin e rezistencës kombëtare gjatë rrugëtimit 40 vjeçar të veprimtarisë atdhetare.