Donald Trump shpall rikandidimin për Shtëpinë e Bardhë

Donald Trump shpalli zyrtarisht rikandidimin e tij për rikthimin në Shtëpinë e Bardhë.

 

“Rikthimi i Amerikës nis nga sot”, u shpreh ish-presidenti gjatë deklaratës së tij për shtyp në Mar-a-Lago ku u shfaq i rrethuar nga flamuj amerikanë, në një fjalim që zgjati pothuajse 1 orë.

 

Trump renditi arritjet e presidencës së tij dhe nuk la pa sulmuar administratën Biden se e ka çuar vendin në humnerë dhe poshtëruar ndërkombëtarisht me tërheqjen e trupave nga Afganistani dhe konflikti në Ukrainë, ku ndezi sërish alarmin e një sulmi bërthamor.

 

“Njerëzit janë të zemëruar dhe ne kemi një president që e zë gjumi në samitet ndërkombëtare”, vijoi ai. Premtoi se nuk do t’ia japë mundësinë Biden që të ketë një madat të dytë duke u angazhuar se deri në ditën e zgjedhjeve do të luftojë si askush më parë ndaj të majtës demokratike radikale që vijon ta shkatërrojë vendin nga brenda.

 

“Kjo nuk do të jetë fushata ime. Kjo do të jetë fushata juaj”, përfundoi ai.

 

Menjëherë për këto deklarata reagoi dhe presidenti aktual Joe Biden, i cili përmes një Twitter-i shkroi se “Trump e ka shkatërruar Amerikën”.