Dua Lipa merr shtetësinë shqiptare

Një ditë para koncertit në sheshin Skënderbej, këngëtarja me famë botërore Dua Lipa ka marrë nështetësinë shqiptare. Kreu i shtetit Bajram Begaj tha se Dua është një shembull frymëzimi për të gjithë rininë, ndërsa kryebashkiaku i Tiranës Erion Veliaj e quajti ambasadore të vendit tonë në botë.

 

“Është kënaqësi e veçantë që sot presim artisten e madhe Dua Lipa. Them artiste e madhe, por ajo është edhe një vajzë e thjeshtë, që krenarinë më të madhe na e ka dhënë ne, Shqipërisë, Kosovës dhe kudo ku ka shqiptarë nëpër botë. Rinia shqiptare ju ka shembull dhe ju keni treguar se ëndrrat arrihen duke punuar gjithnjë e më shumë.”, tha presidenti i Shqiprisë Bajram Begaj.

 

“Të uroj shumë sukses edhe si shtetase e Republikës së Shqipërisë! Mezi presim sukseset e tua dhe të falenderoj që ke mbetur e thjeshtë, sepse e ke kthyer kokën pas, për të kuptuar se sado larg shkon, rrënjët e tua janë këtu, dashurinë e madhe për Shqipërinë e Kosovën nuk e ke fshehur kurrë. Të jam shumë, shumë mirënjohës që pranove të jesh me ne për këto festa.”, tha kryetari i Bashkisë së Tiranës, Erion Veliaj.

 

Për yllin e muzikës botërore, Dua Lipa ky është një moment gëzimi i papërshkrueshëm.

 

“Faleminderit shumë! Është një gëzim i papërshkrueshëm dhe një nder shumë i madh. Jam shumë e emocionuar nga mikpritja, dashuria, mbështetja. Mezi pres koncertin e nesërm.”, pohoi Dua Lipa.

 

Këngëtarja shqiptare me famë botërore do të performojë në Tiranë nesër, për festën e pavarësisë, në një koncert ku hyrja do të jetë falas.