Decentralizimi më i madh i komunave, Penov: Do të bëhet kur të ketë vullnet politik

Se kur komunat do të kenë decentralizim më të madh varet vetëm nga deputetët në parlament, tha ministri i Vetëqeverisjes Lokale,  Risto Penov, pas takimit me kryetarin e Tetovës, Bilal Kasami. Sipas tij, më së shumti është duke menduar për decentralizim financiar, gjegjësisht komunat të marrin më shumë mjete nga shteti, të cilat i mbledhin përmes tatimit mbi vlerën e shtuar.

 

“Datë nuk mund të ketë, por po punohet për ato procese, po kërkojmë momentin kur do të ketë vullnet politik që një ligj i tillë sistematik të kalojë në parlament. Hapat e mëtejshëm për decentralizimin janë duke u punuar. Në momentin që Kuvendi është i bllokuar, nuk është reale të pritet hapja e një debati të tillë.”,- deklaroi ministri i Vetqeverisjes, Lokale Risto Penov.

 

 

Kreu i Tetovës, Bilall Kasami, akuzon për mbivendosje të kompetencave mes autoriteteve qendrore dhe lokale e se sorollatjet institucionale pengojnë zgjidhjen e problemeve reale.

 

“Për mua është e pakuptueshme që PUD, në veçanti, të shkojë në Ministrinë e Transportit për miratim, është e kuptueshme që PUQ-ja dhe Plani hapësinor, të cilat janë edhe me interes kombëtar, të menaxhohen nga autoriteti qendror në Ministria e Transportit. Por, kur të punohet dhe të flasim për organizimin e brendshëm të qyteteve të komunave do të ishte një kompetencë e pastër komunale lokale.”,- u shpreh kryetari i komunës së Tetovës, Bilall Kasami.

 

Teksa presin kohë më të mira për decentralizimi e plotë, Kasami dhe Penov nënshkruan marrëveshjen për bashkëfinancimin e projektit të Programit Ndërkufitar IPA me Kosovën 2014-2020 – “Ringjallja e zejeve dhe ndërtimi i kulturës për zhvillimin e përbashkët të turizmit”.