Renovimet në Sh. F. “26 korriku”, ASh: Drejtori po ribën investime pa nevojë

Aleanca për Shqiptarët akuzon drejtorin e Shkollës Fillore “26 korriku” për keqpërdorim të buxhetit të shkollës. Ata thonë se drejtori, Dritan Ganiu, ka bërë investime në shkollë pa nevojë.

 

“Ai ka filluar ndërtimin e rrethojave të shkollës pa asnjë nevojë dhe arsyetim, sepse shkolla ka rrethoja metalike të ndërtuara para dy viteve. I njëjti drejtor ka filluar edhe fasadimin e shkollës, por edhe ky investim është kryer para pak kohësh dhe fasada është tërësisht e re.”,- tha Astrit Aziri nga Forumi Rinor-Aleanca për Shqiptarët.

 

 

Drejtori i kësaj shkolle hedh poshtë akuzat e ASh-së. Ganiu thotë se ka punuar sipas ligjeve e riparimet kanë qenë të domosdoshme.

 

“Nuk është e vërtetë se fasada është e ndërruar para disa viteve, por është më shumë se 12-13 apo 15 vite dhe nuk është ndërrimi i fasadës vetëm, është lyerja e saj dhe disa sanime që kanë qenë të prishura. Në lidhje me rrethojën, siç e shihni edhe ju, këtu rrethoja nuk ka anash dhe për shkak se mos t’i vëmë rrethojë të re vetëm anash, që nuk shihet shumë, e kemi bërë edhe përpara shkollës.”,- u shpreh drejtori i Shkollës Fillore “26 korriku”, Dritan Ganiu.

 

Sipas Ganiut, këshilltarët e BDI-së në komunën Butel kanë votuar që të ketë revizion e të sqarohen të gjitha akuzat ndaj tij. ASh nga ana tjetër fton Komisionin për Parandalimin e Korrupsionit, Inspektoratin dhe organet e tjera kompetente që të hetojnë keqpërdorimet, që sipas tyre, bën drejtori i kësaj shkolle.